|
ايه حكاية الأطفال العاملين ؟
الاطفال في قرى ومدن مصر من أول سن
تسع سنوات لحد ثمانى عشرة سنة و يمكن
اقل بيشتغلوا في معظم الأعمال فى
المصانع والأراضى الزراعية،والمحالج
والكسارات والورش
،فى المناجم و على السقالات و فوق
السفن و المراكب . الاطفال بدل مايقضوا
سنين الطفولة على الدكك
فى المدرسة و المراجيح
فى النوادى ومراكز الشباب بيقضوها
بين الكيماوي ونار الشمس و سيور المكن
وغبار الرخام . بعض الاطفال بيشتغلوا
في ظروف عمل سيئة . ساعات عمل طويلة
يعني اقل ساعات عمل بيشتغلها أي طفل هي
10 ساعات . و
اجور قليلة يعني اكبر يومية بياخدها
طفل هي خمسة جنيه فى اليوم . و من غير أي
حماية يعني مافيش عقود بين الاطفال و
اصحاب العمل تثبت حقوق الاطفال
العاملين و مافيش تأمينات اجتماعية او
صحية . يعني
لو حصلت لاي طفل اصابة عمل يخرج من غير
تعويض او علاج وعشرات
الاطفال بنسمع عنهم كل فترة
تنقلب بيهم عربية كانت نقلاهم
للغيطان او ينفجر فيهم الرخام من بطن
الجبل او تضيع اديهم او رجليهم مع سير
المكنه ، دا غير الامراض اللي بتصيبهم
من ظروف الشغل نفسه و اللي اثرها بيظهر
بشكل بطئ . كل ده من غير ما يكون للطفل
أي حقوق . يعني الطفل المصري العامل
محروم من حقوقه مرتين .. مرة من حقوقه
الطبيعية فى التعليم واللعب ... الخ
ومرة من حقوقه العمالية زى حقه فى
التأمين الصحى أو الإنضمام لنقابات
تدافع عنه .....الخ
الغريب ان الاطفال العاملين
لاتسري عليهم بنود قوانين العمل
المعمول بيها على العمال رغم
في بعض الاستثناءات
اللى يمكن
تطبيق القانون فيها .
فالقانون المصري وضع
حد ادني لسن تشغيل الاطفال وهو 14 سنة
لكن جعل الحد الادنى للتأمينات
الاجتماعية بلوغ سن 18 سنة و الحد
الادنى للانضمام للنقابات 15 سنة.
والواقع بيقول إن الأطفال بيشتغلوا من
سن 9 سنوات في كل اماكن العمل اليدوي
تقريبا و إن العقوبات المفروضه على
اصحاب العمل بسبب تشغيل الاطفال تحت
السن القانونية ماتساويش يومية ربع
نفر وأن أصحاب العمل بيتحايلوا على
القوانين بكل
الطرق و إن الضحية الوحيدة هم الاطفال .
يعني قوانين تنظيم عمالة الاطفال
ماشية في طريق و واقع عمالة الاطفال
ماشي في طريق.
طيب وإيه العمل :
في الحقيقة
الطفل العامل بالنسبة لصاحب العمل زيه
زي العامل البالغ يعني بيفرض عليه نفس
الواجبات و بياخد من وراه نفس المكاسب
لدرجة إن فيه اعمال بيعتمد فيها اصحاب
العمل على الاطفال فقط . اما بالنسبة
للاسرة فالطفل العامل هو مصدر اساسي من
مصادر الدخل زيه زى أي نفر في البيت و
ما يصحش يغيب عن الشغل
أى يوم . معنى كده إننا قدام عامل
حقيقي لكن سنه صغير . ولحد ماتنتهى
مشكلة عمل الأطفال وتقدر الدولة توفر
لكل طفل فرصة تعليم ومكان فى المدرسة
أو نادى فإن الطفل العامل من حقه
الحماية والتمتع بكل
حقوق العمال و اهمها التأمين الصحى و
الإجتماعي اللي بيوفرله الامان في
العمل . يمكن يكون وعي الاطفال بحقوقهم
اقل و قدرتهم على التعبير عن متطلباتهم
اقل لكن مادام
بيشتغلوا زى الكبار فلازم يتمتعوا على
الأقل بكل
الحماية والحقوق اللى بيتمتع بيها
الكبار .
إحنا عارفين إن
المشكلة معقدة وتحتاج لجهود حكومية
وأهلية ضخمة فوزارات التعليم والقوى
العاملة والتأمينات واتحاد العمال
وغيرهم من المسئولين ،وكذلك الجمعيات
خاصة التى تعمل مع الاطفال كل دول
عليهم دور كبير لعلاج الظاهرة فى الأصل
ومن المنبع .
لكن لحد ما كل طفل
يعود لمكانه الطبيعى بمقاعد الدراسة
والنوادى ومراكز الشباب
لحد ما بيجى اليوم ده علينا
نطالب بتحسين عمل هؤلاء الاطفال
وعلينا أن نعمل مع أسرهم , ونوعيهم ونعمل
على تحسين
أوضاعهم . يعنى
مثلاً نوعيهم برفع
قضايا ضد اصحاب العمل في حالة وقوع
اصابات عمل لاطفالهم اوالتعدي على
حقوقهم . و فيه منظمات اهلية مهتمة
بقضية الاطفال العاملين تقدر تساعد
أهالى الأطفال في الدفاع عن حقوقهم .
المهم نعترف بالمشكلة ونبدأ نفكر فى
الحلول لأن كل الأطراف متفقة لحد
مانقضى على الظاهرة يجب
تحسين شروط عمل الأطفال العاملين
وتمكينهم من التمتع بكافة حقوقهم
و
كلمة اخيرة :
الاطفال
الشغيلة في كل اماكن العمل فرضت الظروف
انهم يتحرموا من حقهم في الطفولة
ويعيشوا حياة الشقى و هم لسه عيال
... و اقل شيئ ممكن نقدمه هو المطالبة
بأقصى حماية ليهم لحد ما يرجعوا
لأماكنهم الطبيعية بين الجناين
أو جوا الفصول .
العودة
إلى القائمة
|