22

 المشاركة فى التنمية  

التنمية هى إن الفلاح مننا تتوفرله كل إحتياجاته .. يعنى شغل يقدر يعيش منه مرتاح .. و سكن فيه مياه حلوة و كهربا و صرف صحي .. ووحدات صحية و بيطرية ومدارس تقدم له هو و أسرته الخدمات بأسعار يقدر عليها .. ومواصلات وطرق تسهل عليه الحياة .. و بيئة نظيفة يعنى من غير تلوث من المصارف وأكوام الزبالة والمصانع .. لكن السؤال اللى عايزين له إجابة هو مين اللى مفروض يحقق التنمية ؟؟ يعنى هل ننتظر المسئولين اللى فى الدولة علشان يوفروا لنا مطالبنا ، و لا لازم يكون لينا دور فى تحقيقها ؟؟ و لو كان لينا دور هل من حقنا نطالب بيه و إزاى نقوم بيه ؟؟

مين المسئول عن التنمية ؟؟

لوهانتكلم عن الريف فالتنمية لازم يشارك فيها كل الأطراف(( الحكومة و الفلاحين والجمعيات الأهلية)) .. والفلاحين يعرفوا إحتياجاتهم و مطالبهم لكن الشيئ اللى ناقص هو الإمكانيات والتدريب والتخطيط للمشروعات التنموية ، وهنا بيجى دور المسئولين اللى عليهم توفير الإمكانات للفلاحين .. وكمان دور الجمعيات اللى عليها توعية الفلاحين ومساعدتهم فى إنجاح المشاريع والتدريب على كيفية إدارتها . معنى الكلام ده إن الدولة والجمعيات لازم يساعدوا الفلاح بكل طريقه ، فالدولة تقدم له قروض علشان يقدر يعمل مشاريع ، وتوفر له شغل هو وأولاده ..  والقروض دى لازم تكون ميسرة فى السداد يعنى مايكونش عليها فوايد مركبة و قصيرة الأجل . الأهم من ده كله إن المسئولين لازم يسمعوا  للجمعيات والفلاحين و ياخدوا رأيهم في المشاريع اللى تخصهم سواء فى الشغل أو فى السكن أو الصحة أو غيره  علشان ما تطبقش أفكار وتجارب غريبة عننا .

لكن إزاى نعمل الوصلة دى بين المسئولين و الفلاحين .. يعنى إيه الطريقة اللى تجبر المسئولين يسمعونا و يساعدونا و يشركونا فى الحاجات اللي تخص بلدنا و حياتنا ؟؟

إيه الطريق للمطالبة بحقنا فى التنمية ؟؟

كلنا عارفين إن الدولة بتتصرف فى شئون الفلاحين.. يعنى القانون أخد من الفلاحين الأراضى غصب عنهم . والبنك بطل يدى للمستأجرين المطرودين من الأراضى أى قروض إنما بيديها للملاك  أصحاب الحيازات بس  .. والفلاح أو الفلاحة من دول ماحليتهٌمش أى ضمانات علشان ياخدوا بيها قروض لمشاريع صغيرة زى تربية المواشى والمشاغل وغيره. ومهما الفلاحين إشتكوا للمسئولين من المياه الملوثة والمجارى اللى طافحة و الهوا اللى مليان دخان المصانع والحشرات والسموم ماحدش بيسأل فيهم . يعنى ببساطة الدولة مش فى أولوياتها هموم المستأجرين ومشاكلهم وتنمية أوضاعهم .

إنما كل ده ما بيقللش من حقنا الأكيد في التنمية و المشاركة فيها  ويفكروا مع بعض المسئولين يسمعوا صوتنا ومطالبتنا بحقوقنا . و ده مش هايحصل غير لما الفلاحين يبقوا  مرتبين إحتياجاتهم و مطالبهم  ويفكروا مع بعض وعندهم فكرة حوالين الطريقة اللى عايزين المسئولين وغيرهم يساعدوهم بيها . الفلاحين لازم يكونوا روابط خاصة بينهم يكون هدفها الأساسى المطالبة بحقهم فى المشاركة والتنمية والتخطيط لحياتهم ومستقبل أولادهم ولازم مطالبنا توصل للمجالس المحلية ومجلس الشعب والمحافظات و الوزارات و الهيئات ، وعشرات الجمعيات و المراكز اللى ممكن لو فكرنا معاهم بشكل جماعى  نحقق جزء من مطالبنا الكتيرة . لأن تحقيق التنمية فى البلد مش خاص بالدولة لوحدها لأ ده حق لكل الناس وواجب عليهم .

وأخيراً لازم نعرف إن حل أزماتنا ومشاكلنا وتحقيق أحلامنا وتحسين أوضاعنا مش هايحلها حد إلا إحنا علشان كده لازم نفكر مع بعض بشكل جماعى . إزاى ممكن نبتدى من جديد . لازم نقتنع رغم خلافاتنا مع بعض إننا مش هنحقق أى حاجة ... لازم الجميع يشارك ومن غير المشاركة مفيش حلول 0  

العودة إلى القائمة