21

الحق فى الإ ئـــــــــــــتمان

تعالوا ندردش شوية عن أوضاعنا فى الريف بعد تطبيق القانون خاصة ما يقال عن قروض الهيئات الحكومية مثل بنك التنمية والإئتمان الزراعى لعمل مشروعات أو لتوفير سكن أو للمساعدة في تكاليف المعيشة .. و كلنا عارفين إن بنك التنمية بطل يساعد الفلاحين أو الفلاحات المستأجرين أو المطرودين من الأراضى من الحصول على قروض لأنهم معندهمش حيازة . و عارفين إنه حتى أيام القروض كان البنك بيفرض  فوايد مركبة صعبة السداد ، دا غيرإن مش كل الفلاحين كان ليهم حق فى الحصول على القروض طويلة الأجل لعمل مشروعات كبيرة . وعارفين كمان إن الفلاحات اللى دايماً حيازاتهم بتبقى صغيرة فرصتهم في القروض بتبقى أقل ولما بيتعرض زوجها  للوفاة ما بتلاقيش قدامها أى مصدر للرزق غير معاش بسيط مابيكفيش. وعارفين إن معظم الفلاحين دلوقت اللى من غير أرض واللى من غير مواشى واللى من غير سكن  مافيش قدامهم أى وسيلة لأكل العيش غير العمل باليومية و تشغيل أولادهم الصغيرين بدل العلام . و إن الفلاحين اللى إستلموا الأراضي البديلة  فى الصحرا مالهوش أى وسيلة إئتمان تساعدهم على زراعة الأرض،وإن الشباب اللى واخدين أراضى إستصلاح مش قادرين يستحملوا الفوايد اللى فرضها البنك على القروض ، والشباب اللى فى القرىأبناء المستأجرين بعد ما إنطردوا من الأراضى الزراعية ماعدش فى أيديهم أى وسيلة للعمل أو للزواج أو السكن و مافيش فرصة لأخد قروض لعمل مشروعات صغيرة .  يعنى حالة الفلاحين رجالة  ستات وشباب  ضنك وحقوقهم ضايعة

الإئتمان ودور الحكومة ؟؟

إحنا نفهم إن لينا حكومة واجب عليها تساعدنا في تدبير المعيشة وإيجاد فرصة عمل، يعنى فى الوقت اللى بتدى فيه الأرض و السكن للملاك وللهيئات الحكومية من أوقاف وإصلاح وأملاك أميرية بعد تطبيق القانون ، وفى الوقت اللى بتمنح فيه القروض للملاك،لازم تدبر وسائل للفلاحين اللى معندهمش حيازات بعد طردهم من الأراضى و المساكن لازم تفرض عن طريق الجمعية تحرير عقود إيجار بين المستأجرين والملاك والأرامل والشباب اللى ماعدش ليهم مستقبل بعد ما راحت الأرض و إنتهى زمن السفر.لازم تدبر لهم وسائل إئتمان لعمل مشاريع إنتاجية ولتوفير مساكن بأسعار معقولة وغيرها من الإحتياجات .

الإئتمان ودور الفلاحين ؟؟

لازم نفهم إن حقنا فى الإئتمان يا اخواننا زى حقنا في فرصة عمل  ودخل محترم وسكن مناسب وحياة انسانية . و الحق ده بتكفله القوانين و الدستور المصرى اللى بيأكد على ضرورة وجود تعاونيات لتقديم الدعم للفلاحين ، وتساعدهم على المعايش . و إن كان الواقع بيقول إن حق الفلاحين فى الحصول على الإئتمان ضاع بعد ضياع الأرض وبعد ما الحكومة تخلت عن المستأجرين  ،إلا أن ده ما بيمنعش وجود الحق في الإئتمان ووجوب الدفاع عنه بإستخدام كل الطرق.عن طريق تكوين روابط فلاحية يكون من أهم أهدافها المطالبة بجهات إئتمان للفئات اللى إتكلمنا عنها وتكون السيدات والشباب مشاركين فيها وبيعبروا عن مشاكلهم ، وعن طريق الضغط على المسئولين فى المجالس المحلية و مجلس الشعب والمحافظات،وعن طريق التعاون مع المراكز و الجمعيات الأهلية اللى بتدافع عن حقوق الفلاحين. وتكون مطالبنا مش بس توفير وسيلة للإئتمان لكن كمان خفض نسبة الفوايد على القروض وتسهيل عملية السداد وجدولة ديون أصحاب القروض القديمة ، و توسيع دايرة القروض علشان تضم الفلاحين المستأجرين وعمال اليومية والسيدات والشباب، و تنويع القروض من قرض لمستلزمات الزراعة ، لقرض لتسمين المواشى وعمل مشروعات إنتاجية للسيدات والشباب، وقروض لتوفير المساكن بأسعار مخفضة . والكلام ده معمول بيه فى معظم دول العالم،والحكومة عندنا بتقدر تقدم كل التسهيلات الممكنة للى مش محتاجينها يعنى فى إديها تساعد الناس الأولى بالرعاية و الإهتمام وهم الفلاحين وسكان القرى .

لكن علينا نعمل ايه؟؟

نتقدم لبنك بطلب للقرض ونطلب منه عمل معاينة على أراضينا المستأجرة وبدون عقود وممكن نعمل محضر إثبات حالة بأننا مستأجرين هذه الأرض كمستند لضمان القرض أو تقديم أية ضمانات أخرى .

لكن كما علينا وإحنا بنوقع العقود مع البنك إننا لانوقع إلا على عقد القرض ومش لازم نوقع على شيكات على بياض ولازم نكون واعيين بحقوقنا وإحنا بنتعامل مع البنك وليس معنى ذلك فقد الثقة فى موظف البنك لكن الموظف ممكن يتغيرأوحتى مديرالبنك ، وكمان ليه نوقع على أوراق إحنا منعرفش فيها إيه لازم نقرأ الورق اللى هنوقع عليه علشان القانون المصرى لا يقيد إلا بالأوراق والمستندات ولا يحمى أيضاً حسنى النية أو الإتفاقيات الشفوية .

ولازم نعرف أن قرض البنك الزراعى هو حق لينا وده دور البنك علشان يبقى فيه تقدم زراعى وفيه تنمية  

العودة إلى القائمة