20

الحق فى الحيازة الآمنة للسكن

السكن هو المكان اللى بنرجع له بعد الشقا والتعب طوال اليوم علشان نرتاح .. وهو المكان اللى تتربى فيه عيالنا و تتعلم المشى والجرى والكلام .. وهو العنوان اللى كل المعارف والحبايب تعرفنا بيه .. واللى شاف كل أفراحنا وأحزاننا .. واللى كل حته منه ليها فايدة و ليها حدوته نحكيها كل مانفتكرها .. يعنى البيت زى الغيط كده حته مننا و من غيره نحس بالضياع .

والسكن حق لكل بنى آدم بتكفله كل القوانين والدساتير اللى فى الدنيا ، ومش من حق أى حد انه يتعدى عليه أو يحرم منه أصحابه سواء كانوا ملاك أو مستأجرين. والدولة عليها واجب توفير السكن للناس بأسعار يقدروا عليها و ضمانات تمنع إنهم يبقوا فى الشارع من غير ذنب

لكن إيه وضع حيازة السكن فى القرى ؟؟

كل واحد فينا عارف إن الفلاحين بعد قانون الإيجارات وبعد قرارات الحكومة كل يوم والتانى مش حاسين بالأمان فى المساكن خاصة المساكن الملحقة بالأراضى الزراعية أومساكن العزب والنجوع المملوكة لهيئات الدولة زى الأوقاف والأملاك الأميرية 000إلخ. الفلاحين اللى إنطردوا من الأراضى  بعضهم إنطرد كمان من البيوت المبنية عليها واللى ورثتوها عن جدود الجدود. و الفلاحين اللى بيسمحوا لهم أيام الإنتخابات يبنوا على الأراضى الزراعية ويرجعوا يهدوا بيوتهم بقرارالحاكم العسكرى. و الفلاحين اللى إستلموا الأراضى البديلة فى الصحرا مالهومش سكن هناك . واللي بانيين على أراضى أملاك الدوله أوهيئة الأوقاف أوالإصلاح يطلع عليهم البلدوزر يشيل البيوت من أساسها لأنها تعدى على الأملاك أولأن فيه مشروع مفاجئ هايتعمل مكانها حتى لو كان مع السكان إثباتات بالحيازة .

واللى بيحصل إن كل الناس اللى بتخرج من بيوتها مبتتوفرش ليها مساكن بديلة ولا بتاخد تعويضات،يعني مالهاش طريق غير الشوارع والخيام لإن مافيش مساكن يقدروا على سعرها ومافيش مكان فاضى عند المعارف والقرايب يسعهم ، ومافيش إستجابة من المسئولين مهما كان عدد الشكاوى . والشباب اللى كانوا زمان بيعيشوا فى بيت العيلة بعد الجواز ماعدوش قادرين يتجوزوا بعد ما راح بيت العيلة وإرتفعت أسعار الأراضى و البيوت.

معنى كده :

إن الحكومة  كل يوم بتعمل قوانين مبتهتمش بحق الناس فى السكن . وإن الحكومة مابتحميش حقوق الفلاحين فى انهم يعيشوا فى أمان بين أربع حيطان.وإن الفلاح مش بس بيتحرم من رزقه دا كمان بيتحرم من إحساسه بالإستقرارهو وأسرته من غير بديل .

إيه العمل ؟؟:

لازم نكون متأكدين إن الدستور المصرى أقر بحق المواطن أيا كان في السكن. وإن الحكومة المصرية موقعة على كل الإتفاقيات العالمية اللى بتضمن حق الناس في السكن وضرورة توفير مساكن بديلة أوتعويضات مناسبة للسكان فى حالة طردهم من البيوت لأى سبب. يعنى المطالبة بحيازة آمنة للسكن هى حق من حقوقنا الأكيدة .

لازم الفلاحين يوصلوا صوتهم فى كل حالة يتعرضوا فيها للطرد من مساكنهم أولازالة المساكن من غير تعويض أوبديل .. يرفعوا قضايا و يتعاونوا مع أعضاء المجالس الشعبية والمحلية والجمعيات الأهلية اللي فيها ناس مؤمنة بحقوقهم و بتدافع عنهم  ولازم تتكون روابط فلاحية من الفلاحين نفسهم تدافع عن حقهم و حق أولادهم في السكن، وتطالب مش بس بحقوق المطرودين من المنازل لكن كمان بحق الشباب فى  إنه يلاقى سكن يقدر على سعره، وبحق أصحاب الأراضى البديلة فى سكن قريب من الأرض، وتطالب بحماية الفلاحين من الطرد والإزالة من المساكن الملحقة بالأرض الزراعية لو كان الفلاح خرج من الأرض سواء من الجهات الحكومية أو من الملاك .

وأكيد مع إيمانا بحقوقنا  اللى كفلها لنا القانون والدستور والمواثيق الدولية هانقدر نحميها ونحمى أولادنا من التشرد و الضياع .  

العودة إلى القائمة