19

الحق فى الحيازة الامنة للأرض

الحيازة الآمنة معناها ان الفلاح يحتكم على كام قيراط يزرع و يرعى فيهم هو و عياله من غير ما ينطرد في أي لحظة بقرار أو قانون لاشارك فى صنعه ولاسمع عنه.

الحيازة الآمنة معناها ان الفلاح ما يبقاش شايل هم ري الارض و السماد و التقاوى و المبيد .. يعني تبقى  الحاجات دى متوفرة للفلاح و في قدرته يدفع ثمنها .

الحيازة الآمنة معناها ان الفلاح يكون معاه عقد يثبت حيازته للارض و المالك مايطلعهوش منها في اي وقت ولا لأى سبب .

لكن الواقع ايه ؟؟

اللى حصل بعد تطبيق القانون الجديد فى 97 .. ان الملاك طردوا الفلاحين من الاراضي الايجار بالغصب و ساعات قبل حتى ما يجنوا المحصول اللي تعبوا فيه شهور . وإن  هيئة الاوقاف و الاصلاح الزراعى أكلت عيش الفلاحين  والغريب إن حتى بعض الأراضى المملوكة لبعض الجهات الحكومية  ترفض تبيع للفلاحين مهما طالبوا بالشراء ، و تفرض عليهم يدفعوا الايجار حتى لو المحصول غرق أو أكلته الدودة أو أخده الريح ولم تقم مثل أى حكومة فى العالم بتعويض الفلاحين الذين خسرت مزروعاتهم بسبب الكوارث الطبيعية . ولما الفلاح يرفع قضية فإن المحاكم بتقعد بالسنة والاثنين والثلاثة علشان تحكم حتى لو الفلاح معاه إثباتات بالحيازة من خمسين سنة . وطبعاً  الفلاح مايقدرش يشترى أرض لأن سعرها في السما وهو لسه حالته على الارض .

والواقع ان الفلاحين بيأجروا من غير عقود تثبت حقهم في الايجار و تمكنهم من أخذ قروض البنك أو الاستفادة بميزات الجمعية الزراعية .

وان عدداً قليلاً جداً منهم إستلم أراضي بديلة في الصحرا مافيهاش مية و لا طريق و لا جمعية زراعية و لا بنك تسليف ومحتاجة لعشرات  السنين علشان تستصلح ، دا غير البلطجية اللي بيهددوا الفلاحين بالسلاح في الاراضي الجديدة من غير حماية  . و ان كل الفلاحين اللى ما استلموش أراضي بديلة بيشتغلوا اجرية وما يياخدوش غير ملاليم  ماتكفيش عيش حاف . و ان ولادهم طلعوا من المدارس و بناتهم مش عارفين يتجهزوا و صحتهم في النازل من قلة الاكل و سعر الدوا اللي مايقدروش عليه. و ان الناس بتدبح بعضها على شبر أرض و على نوبة ري و على مافيش ..

الواقع يا أخوانا ان حلمنا كلنا اتسرق .. حلمنا بأرض في الصحرا أو في الوادي توفر رزق لينا و لعيالنا بقى مستحيل .. و حلمنا ان ولادنا تتعلم و تكبر في ظروف أحسن من اللى عشناها بقى وهم .. و حلمنا بشغله تانية غير الفلاحة اللي اتولدنا لقينا نفسنا مانعرفش غيرها مش ممكن يتحقق لأنه مافيش شغل لا في البلد و لا في البندر . و ان كل كلام الحكومة المدهون بزبدة في الارض البديلة و الشغل البديل بقى ماسخ و مالوش اصل .

إيه العمل ؟؟

قبل مانتكلم فى إيه العمل لازم نعرف إن لينا حق فى الحياة.. لينا حق نشتغل ونكسب ونربى عيالنا.. ولينا حق يكون عندنا أرض حاسين فيها بالامان، يعنى مش خايفين نتجرجر فى أى لحظة للقسم علشان نمضى إقرار باخلاء الارض ولينا حق فى أخذ تعويضات عن التحسينات والمبانى وتجويد الارض للى خرجنا منها. وان فيه واجب على الدولة اللى خدت مننا الاراضى فى يوم و ليلة انها توفرلنا البديل و لازم تقوم بالواجب ده ومتتخلاش عنا.. عن الفلاحين اللى طول عمرهم رجليهم غارسة فى الطين لاجل القمح و القطن والخضرة تعم البلد فى الريف و الحضر .

من حقنا يا إخونا نطالب بحقوقنا اللى كفلها القانون والدستور والاتفاقيات الدولية .. نرفع قضايا  للتعويض عن خسائرنا بسبب الطرد من الأرض وقضايا لإستلام أراضى بديلة ودعوى بإلزام الملاك بتحرير عقود الإيجار ودعوى على الحكومة لعمل تشريع يحمى أمان الحيازة من حقنا نعمل رابطة للفلاحين المطرودين تطالب بكل حقوقنا وتساعدنا على الزراعة .. تسمع صوتنا للمسئولين فى وزارة الزراعة والمجالس المحلية وفى المحافظة وفى مجلس الشعب وفى كل مكان ..

ولازم يكون فى دماغنا وقلبنا طول الوقت ان 904 الف فلاح وعيالهم جنب الناس اللى واقفين معاهم ومؤمنين بحقهم .. يقدروا لو اصبحوا يد وحدة انهم مش بس يسمعوا صوتهم للناس كلها، لكن كمان يحققوا مطالبهم فى مصدر دخل امن و حياة انسانية .  

العودة إلى القائمة