والنبى عيب مش كده ولا ايه

يا جماعة يا بتوع الاجهزة عيب:
- تخترقوا اميلتنا ماشى.
- تتلصصوا على مكاتبنا ماشى.
- تزايدوا علينا فى الوطنية وتحطوا ايديكم متشابكة مع الاسرائيليين وتصدروا لهم الغاز ناقص مليارات كل سنة واحنا نقف طوابير علشان ناخد غازنا بعشرة اضعاف تصديره لاسرائيل نقول ومالوا
- ينصب علينا شوية مستشارين وياخدوا عشرين مليار جنيه كل سنة مرتبات واحنا بنشحت علشان نكمل عشانا نوم لان حضراتكم مستكترين 1500 جنيه حد ادنى للاجور نقول زى بعضه
- تهجموا مكاتب منظمات مصرية حقوقية وتتهموها بالعمالة ماشى.
- تشوهوا سمعة النشطاء والثوار وتحاكموهم ماشى
- تعتقلوا عشرات الالاف وتحاكموهم عسكريا وتحبسوهم ظلماً وعدوانا ماشى.
- تصيبوا وتقتلوا الالاف المصريين وتتحايلوا على القانون علشان القتلة يطلعوا براءة برده ماشى.
- تعملوا كرنفالات واحتفالات وانتخابات واتفاقيات علشان ضمان الخروج الامن ومحدش يحاسبكوا على جرايمكوا برده ماشى
- تعملوا محاكمات وهمية وتطلعوا القتلة ابرياء وتهدموا الاضرحة وتقطعوا الايادى والاذن تفتعلوا الفتنة الطائفية نقول ميحصلش حاجة فترة وهتعدى
- على فكرة دى حاجات بسيطة قوى من تاريخكم الحافل خلال عام واحد فقط لكن برده بنقول وايه يعنى مش اجهزة
- لكن تحذفوا رسائل متعلقة بمذكرات وقضايا ومواعيد تخص شغلنا مع الصيادين والفلاحين ...هتكسبوا ايه لما تلخبطوا مواعيد لقاء مجموعة من الصيادين هيناقشوا حلول لمشاكلهم فى الصيد غير الامن ( يعنى وقف صيد الزريعة علشان السمك يزيد – يعنى وقف تجفيف البحيرات والاستيلاء عليها من قبل اصحاب النفوذ علشان نحافظ على مواردنا المائية )ياللى بتفهموا كل حاجة ....والنبى مش حاجة تكسف.
لما تساوا نفسكوا وانتم اعظم جهاز فى الدنيا ( احنا كنا بنتفشخر بيكوا زمان) بشوية صيادين على باب الله كل همهم يرزقوا بعشرين تلاتين جنيه فى اليوم بدون شرطة مسطحات تحبسهم أو صاحب مزرعة ياكل عرقهم هيعملوا نقابة تساعدهم على المعايش ...اتكسفوا جاتكم ستين نيلة
واللى يمكن الصيادين الغلابة هما اللى هيطلعوا يوم 25 يناير 2012 يهزوا عرشكم الخربان
بحسن نية كده عيب
وميصحش
وياريت تبلغوا رئيسكم الرسالة
"انتم اكبر من كده.
وعلى رأى فؤاد المهندس
مش كده ولا ايه" المجد لشهداء
عاش كفاح العمال الفلاحين والصيادين
وكل المنتجين بالمحروسة

العودة الي القائمة