23

   حق الاطفال العاملين في

التأمين الاجتماعي و الانضمام للنقابات

 الاطفال في مصر في القرى و المدن من اول سن تسع سنوات و يمكن اقل بيشتغلوا في كل الاماكن . في المصانع و المزارع ، في المحالج و الكسارات و الورش ،في المناجم و على السقالات و فوق السفن و المراكب . الاطفال بدل مايقضوا سنين الطفولة على الدكك و المراجيح بيقضوها بين الكيماوي ونار الشمس و سيور المكن و غبار الرخام و الديناميت . الاطفال بيشتغلوا في أسوأ الظروف . ساعات عمل طويلة يعني اقل ساعات عمل بيشتغلها أي طفل هي 10 ساعات .  و اجور قليلة يعني اكبر يومية بياخدها طفل هي 3 جنية . و من غير أي حماية يعني مافيش عقود بين الاطفال و اصحاب العمل تثبت حقوق الاطفال العاملين و مافيش تأمينات اجتماعية او صحية على الاطفال .  يعني لو حصلت لاي طفل اصابة عمل يخرج من غير تعويض او علاج و الاف الاطفال بنسمع عنهم كل يوم تنقلب بيهم عربية كانت نقلاهم للغيطان او ينفجر فيهم الديناميت و هو بيفجر الرخام من بطن الجبل او تضيع اديهم او رجليهم مع سير المكنه ، دا غير الامراض اللي بتصيبهم من ظروف الشغل نفسه و اللي اثرها بيظهر على البطيء . كل ده من غير ما يكون للطفل أي حقوق بما فيهم ابسط حقوقه في انه ينضم لنقابه تدافع عنه و تحميه . يعني الطفل المصري العامل محروم من حقه في التأمينات الاجتماعية و من حقه في الانضمام لنقابات عماليه . الغريب ان الاطفال العاملين بتسري عليهم بنود قوانين العمل المعمول بيها على العمال البالغين لكن في اجرائات الحماية الاطفال لهم استثنائات قانونية غير مبررة .

فالقانون المصري وضع الحد الادني لسن تشغيل الاطفال 14 سنة لكن جعل الحد الادنى للتأمينات الاجتماعية 18 سنة و الحد الادنى للانضمام للنقابات 15 سنة . ده بالنسبة للعمالة القانونية للاطفال . و الواقع بيقول ان الاطفال بيشتغلوا من سن 9 سنوات و أقل في كل اماكن العمل اليدوي تقريبا و ان العقوبات المفروضه على اصحاب العمل بسبب تشغيل الاطفال تحت السن القانونية ماتسويش يومية خمس أنفار و ان اصحاب العمل بيتحايلوا على القوانين و على المسئولين بكل الطرق و ان الضحية الوحيدة هم الاطفال .  يعني قوانين تنظيم عمالة الاطفال ماشية في طريق و واقع عمالة الاطفال ماشي في طريق.

طيب و ايه العمل :

  في الحقيقة الطفل العامل بالنسبة لصاحب العمل زيه زي العامل البالغ يعني بيفرض عليه نفس الواجبات و بياخد من وراه نفس الارباح لدرجة ان فيه اعمال بيعتمد فيها اصحاب العمل على الاطفال فقط . اما بالنسبة للاسرة فالطفل العامل هو مصدر اساسي من مصادر الدخل زيه زى أي نفر في البيت و ما يصحش يغيب عن الشغل يوم . معنى كدة اننا قدام عامل حقيقي لكن سنه صغير . و العامل ده من حقه انه يتمتع بكل حقوق العمال و اهمها التأمينات الاجتماعية اللي بتوفرله الامان في العمل و حق الانضمام للنقابات اللي تقدر تحمي حقوقه . يمكن يكون وعي الاطفال بحقوقهم اقل و قدرتهم على التعبير عن متطلباتهم اقل لكن فيه ناس كتير تقدر تقوم بالدور ده .  ليهم اخوان من العمال البالغين اللي هم اكتر ناس فاهمين مأساة اخوانهم و هم دول اكتر ناس يقدروا يتبنوا قضيتهم و يدافعوا عن حقهم من خلال نقاباتهم و يقدروا كمان يوعوا الاطفال بحقوقهم . و ليهم اسر تقدر ترفع قضايا ضد اصحاب العمل في حالة وقوع اصابات

عمل لاطفالهم او في حالة التعدي على حقوقهم . و فيه منظمات اهلية ياما مهتمة بقضية الاطفال العاملين تقدر تبذل كل جهدها في الدفاع عن حقهم . المهم ان تتوحد مطالب كل الاطراف في حق جميع الاطفال العاملين في التمتع بالضمان الاجتماعي و الانضمام للنقابات العمالية بصرف النظر عن الحد الادنى لسن العمل الغير معمول بيه واقعيا .

 و كلمة اخيرة :

 الاطفال الشغيلة في كل اماكن العمل فرضت الظروف  انهم يتحرموا من حقهم في الطفولة  ويعيشوا حياة الشقى و هما لسه عيال ... و اقل شئ ممكن نقدمه هو المطالبة بأقصى حماية ليهم طالما مش قادرين نرجعهم لاماكنهم الطبيعية بين الجناين و جوا الفصول .

العوده إلى القائمه