22
|
الحق فى الامان الاجتماعى
أختي الفلاحة .. يعني إيه ضمان اجتماعي ؟؟؟ و إيه فايدة الضمان الاجتماعي ؟؟؟ الضمان الاجتماعي هو ببساطة مبلغ من المال يعطى للمواطن في حالات معينة .. مثلا لو طلع معاش من الشغل أو لو خرج بإصابة عمل .. أو للسيدة اللى زوجها يتوفي و تبقى بتصرف على الاولاد .. و هو مش منحة أو هبة من الحكومة .. لان العامل بيعطى كتير في سنين عمله و من حقه ياخد اللى يكفيه لما يتوقف عن العمل .. و السيدة اللى بتربي عيال محتاجة تقدر تعلمهم و تصرف عليهم علشان يكبروا و يخدموا البلد .. و الناس كلها في البلد الموظفين و العمال و حتى الفلاحين بيدفعوا ضرايب للحكومة علشان تدفعها للمحتاجين .. يبقى الضمان الاجتماعي حق للناس واجب تطالب بيه .. فيه مشكلتين بيواجهم السيدات و خصوصا العاملات في الغيطان الاولي أنهم بيشتغلوا من غير أي ضمانات يعنى لما واحدة تنصاب أو تبطل تشتغل ماتلاقيش حاجة تصرف بيها على البيت أو حتى على نفسها ..و التانية إن الضمان اللى بتاخده الارملة او المطلقة من الحكومة يبقى قليل جدا لا يزيد على 70 جنيه في أحسن الأحوال . و هو مبلغ لا يكفى احتياجات البيت و الاولاد .. و رغم أن الأسعار بترتفع ياما بيفضل مرتب الضمان على حاله بدون تغيير و لما ابن او بنت تتزوج يخصموا من ضمان الام عشرين أو أربعين جنيه . الحكومة دايما تقول مافيش فلوس و إنها ما تقدرش تعمل أي شيء لمساعدة الناس الفقراء.لكن لما نعرف نسبة الضرايب اللى بتندفع للحكومة من مال كل الشغيلة في المصانع و المكاتب و الغيطان .. لما نعرف أن الحكومة على يدك قدرت تعمل حاجات كتير للملاك .. قدرت تاخد الارض منك و من جوزك و عيالك من غير أي تعويض و تديها للناس اللى مش محتاجين .. و ان الحكومة بتسيب الاغنياء يبنوا الفنادق و المطاعم و الاماكن الفخمة اللى عمرك ما دخلتيها و لا هتدخليها .. لما نعرف كل ده هنفهم إن الحكومة تقدر تعمل قوانين تفرض على صاحب الارض انه يعمل ضمان للعاملات الاجرية اللى عنده .. و تقدر تعمل قانون يفرض على اصحاب المال أنهم يدفعوا ضرايب حقيقية لصالح الناس الفقرا .. زى ما بتعمل قوانين لصالح الاغنيا و تنفذها على رقبة الفقير... يعنى ببساطة العاملة في الغيط ليها حق فى المطالبة بضمان اجتماعي و الارملة أو المطلقة ليها الحق تحدد المرتب اللى يخليها تقدر تصرف على البيت و العيال .. و الحق ده موجود في القانون و الدستور .. الطريق الوحيد للوصول للحق ده أن العاملات تطالب بالضمان في المحاكم و تطالب نواب الدايرة بتوصيل صوتهم في البرلمان بفرض الضمان الاجتماعي على صاحب الارض .. و إن الارامل يطالبوا بزيادة قيمة الضمان عن طريق النواب و عن طريق الصحافة و التليفزيون ... وإن السيدات كلهم يبقوا يد واحدة مع الرجالة للمطالبه بالحق في الضمان لان الراجل كمان بيعاني من نفس المشكلة ... مافيش مشكلة من غير حل .. و طول ما فيه حكومة و طول ما فيه نواب و طول ما فيه قانون بيضمن الحق .. يبقى لازم نستخدم كل طريقة علشان نفرض على الحكومة إنها تحمي حقنا و ما نصدقش أي كلام غير اللى بنشوفه بعنينا .. و احنا بعنينا شايفين الفقرا من الفلاحين عايشين ازاي و شايفين الاغنيا و الملاك عايشين ازاي و شايفين الحكومة بتعمل لصالح مين .. و بإدينا نقلب الآية و نفرض مطالبنا لو وقفنا جنب بعض و فهمنا حقوقنا في الحياة و في ضمان يساعدنا على المعايش ... |